சிவகார்த்திகேயன் நடிப்பில் வெளியான அமரன் படத்தை திரைப்பிரபலங்கள் பலர் பாராட்டி வருகின்றனர்.
சென்னை,
நடிகர் சிவகார்த்திகேயன் நடிப்பில் உருவான 'அமரன்' திரைப்படம் தீபாவளி வெளியீடாக அக்டோபர் 31-ம் தேதி திரையரங்குகளில் வெளியானது. இந்தப் படத்தை நடிகர் கமல்ஹாசனின் ஆர்கேஎப்ஐ தயாரிப்பு நிறுவனம் தயாரித்துள்ளது. மறைந்த தமிழக ராணுவ மேஜர் முகுந்த் வரதராஜனின் வாழ்க்கையைத் தழுவி எடுக்கப்பட்ட இப்படம் ரசிகர்களிடம் பெரிய வரவேற்பைப் பெற்றுள்ளது. இதில் சிவகார்த்திகேயன் மேஜர் முகுந்தாகவும், முகுந்தின் மனைவி இந்துவாக நடிகை சாய் பல்லவியும் நடித்துள்ளனர்.
உலகளவில் கிட்டதட்ட 900-க்கும் மேற்பட்ட திரையரங்குகளில் 'அமரன்' திரைப்படம் வெளியாகின. திரையிட்ட இடங்களில் எல்லாம் அமரன் படத்திற்கு மகத்தான வரவேற்பு கிடைத்துள்ளது. இந்த படத்தை திரைப் பிரபலங்கள் உள்ளிட்ட அனைவரும் பாராட்டி வருகின்றனர்.இத்திரைப்படம் வெளியான முதல் நாளில் உலகளவில் ரூ.42.3 கோடி வசூலித்துள்ளதாக படக்குழு அறிவித்தது.
இந்தநிலையில் 'அமரன்' திரைப்படத்தை பார்த்த இசையமைப்பாளர் அனிருத் அவரது எக்ஸ் தளத்தில் பாராட்டி பதிவிட்டுள்ளார். அதில் "அமரன் சிறந்த சினிமாவாக உள்ளது. முன்பு எப்போதும் இல்லாத அளவுக்கு சிவகார்த்திகேயனை நினைத்து பெருமையாக உள்ளது. என் சகோதரர் ராஜ்குமார் பெரியசாமி மற்றும் படக்குழுவை சேர்ந்த அனைவருக்கும் மனமார்ந்த வாழ்த்துக்கள்," என்று குறிப்பிட்டுள்ளார்.
#Amaran is cinema at its best Proud of my @Siva_Kartikeyan more than ever ❤️❤️❤️ Heartfelt congrats and big ups to my brother @Rajkumar_KP and your whole technical team for creating this @ikamalhaasan sir, Mahendran sir and Disney bro
— Anirudh Ravichander (@anirudhofficial) November 6, 2024