நாடாளுமன்றத்தில் முழு பலத்துடன் மணிப்பூர் விவகாரத்தை எழுப்புவோம்: ராகுல்காங்கிரஸ் மற்றும் இந்தியா கூட்டணிக் கட்சிகள் நாடாளுமன்றத்தில் முழு பலத்துடன் மணிப்பூர் விவகாரத்தை எழுப்புவோம் என்றார் ராகுல் காந்தி.
மணிப்பூரில் ராகுல்
புது தில்லி: காங்கிரஸ் மற்றும் இந்தியா கூட்டணிக் கட்சிகள் இணைந்து, முழு பலத்துடன் நாடாளுமன்றத்தில் மணிப்பூர் விவகாரத்தை எழுப்புவோம், மணிப்பூர் வன்முறைக்கு மத்திய அரசு தீர்வு காண அழுத்தம் கொடுப்போம் என்று மக்களவை எதிர்க்கட்சித் தலைவர் ராகுல் காந்தி தெரிவித்துள்ளார்.
வன்முறையால் பாதிக்கப்பட்டிருக்கும் மணிப்பூர் மாநிலத்துக்குச் சென்றிருந்த ராகுல் காந்தி செய்தியாளர்களிடம் பேசுகையில் இதனைத் தெரிவித்தார்.
பிரதமர் நரேந்திர மோடி, மணிப்பூர் மாநிலத்துக்குச் சென்று, அங்குள்ள மக்களின் பிரச்னைகளை கேட்டறிந்து, மாநில மக்களிடம் அமைதியை நிலைநாட்ட வலியுறுத்த வேண்டும் என்று ராகுல் கோரிக்கை வைத்துள்ளார்.
மத வன்முறையால் பாதிக்கப்பட்டிருக்கும் மணிப்பூர் மாநிலத்துக்குக் கடந்த திங்கள்கிழமை, நேரில் சென்றிருந்த ராகுல், அங்கு மக்களிடம் நேரடியாக உரையாடிய விடியோவை தன்னுடைய எக்ஸ் பக்கத்தில் பகிர்ந்துள்ளதோடு, மணிப்பூரில் வன்முறை வெடித்தபிறகு நான் மூன்று முறை அங்கு சென்று வந்தேன், ஆனால், கெடுபயனாக அங்கு இதுவரை எந்த முன்னேற்றமும் ஏற்படவில்லை, இன்று வரை அந்த மாநிலம் இரண்டு பாகமாகப் பிரிந்து கிடக்கிறது.
வீடுகள் எரிக்கப்படுகின்றன. உயிர்கள் கொல்லப்படுகின்றன. பல குடும்பங்கள் நிவாரண முகாம்களில்தான் தங்கியிருக்கின்றன. எனவே, பிரதமர் நேரடியாக அங்குச் சென்று நிலைமையை ஆராய வேண்டும். காங்கிரஸ் மற்றும் இந்தியா கூட்டணி, மணிப்பூரில் அமைதியைக் கொண்டு வர வேண்டும் என்று நாடாளுமன்றத்தில் முழு பலத்துடன் அழுத்தம் கொடுக்கும் என்று தெரிவித்துள்ளார்.