விருதுநகா் அருகே 80 பவுன் தங்க நகைகள் திருட்டு: வடமாநில இளைஞா் கைது

விருதுநகா் அருகே 80 பவுன் தங்க நகைகள் திருட்டு: வடமாநில இளைஞா் கைது80 பவுன் தங்க நகைகள் திருடப்பட்ட வழக்கில் மத்தியபிரதேசத்தைச் சோ்ந்த இளைஞரை தனிப்படை போலீஸாா் கைது செய்தனா்.

விருதுநகா் அருகே 80 பவுன் தங்க நகைகள் திருடப்பட்ட வழக்கில் மத்தியபிரதேசத்தைச் சோ்ந்த இளைஞரை தனிப்படை போலீஸாா் சனிக்கிழமை கைது செய்தனா்.

விருதுநகா் அருகே ஆா்.ஆா். நகரில் தனியாா் சிமென்ட் ஆலை உள்ளது. இந்த ஆலை வளாகத்தில் துணை மேலாளா்கள், அலுவலா்களுக்கான குடியிருப்புகள் உள்ளன. இங்குள்ள விருந்தினா் மாளிகையில் பல்வேறு கட்சி முக்கிய பிரமுகா்கள், தலைவா்கள் தங்குவது வழக்கம். இதனால், ஆலை வளாகம் முழுவதும் 24 மணி நேரமும் காவலா்கள் தீவிர கண்காணிப்புப் பணியில் ஈடுபட்டிருப்பா். இந்த பகுதியில் பல்வேறு இடங்களில் கண்காணிப்பு கேமராக்களும் உள்ளன. இந்த நிலையில், கடந்த ஜூலை 13 ஆம் தேதி இரவு இந்த ஆலையில் துணைப் பொது மேலாளராக பணிபுரியும் பாலமுருகன் வீட்டிக்குள் புகுந்த மா்ம நபா்கள், பீரோவில் வைக்கப்பட்டிருந்த 80 பவுன் தங்க நகைகள், ரூ.50 ஆயிரம் பணம், ரூ.15 ஆயிரம் மதிப்புள்ள வெள்ளிப் பொருள்களை திருடிச் சென்றனா்.

இதுகுறித்து வச்சகாரப்பட்டி போலீஸாா் வழக்குப் பதிந்து கண்காணிப்பு கேமராக்களை ஆய்வு செய்த போது, ஆலை வளாகத்தில் முகமூடி அணிந்த 4 வடமாநிலத்தினா் ஆயுதங்களுடன் வீட்டுக்குள் செல்வது தெரிந்தது.

இதையடுத்து, மாவட்ட காவல் கண்காணிப்பாளா் பெரோஸ்கான் அப்துல்லா உத்தரவின் பேரில், சிவகாசி நகா் காவல் ஆய்வாளா் புகழேந்தி தலைமையிலான தனிப் படை போலீஸாா், மத்திய பிரதேசம் சென்று அங்குள்ள தாா் மாவட்டம், பகோலியைச் சோ்ந்த பாா்சிங் (24) என்பவரை கைது செய்து வச்சகாரப்பட்டி காவல் நிலையத்துக்கு சனிக்கிழமை அழைத்து வந்தனா். இங்கு இவரிடம் இந்தத் திருட்டில் தொடா்புடைய மற்ற மூவரது இருப்பிடம், திருடப்பட்ட நகைகள் குறித்து போலீஸாா் விசாரித்து வருகின்றனா்.