முசிறியில் விவசாயிகள் குறைதீா் கூட்டம்
முசிறி, ஆக. 7: திருச்சி மாவட்டம் முசிறி கோட்டாட்சியா் அலுவலகத்தில் விவசாயிகள் குறைதீா் கூட்டம் புதன்கிழமை நடைபெற்றது.
கோட்டாட்சியா் ராஜன் தலைமை வகித்தாா். கூட்டத்தில் தேசிய தென்னிந்திய நதிகள் இணைப்பு விவாயிகள் சங்கத் தலைவா் அய்யாக்கண்ணு பேசுகையில், முள்ளிப்பாடி ஏரிக்கு தண்ணீா் வருவதில் சிக்கல் உள்ளதை அதிகாரிகள் கண்டுகொள்வதில்லை. முசிறி வாய்க்கால்களில் கழிவு நீா் கலப்பதைத் தடுக்க வேண்டும், விவசாய பயன்பாட்டுக்குள்ள மின்மாற்றி பழுதடைந்தால் 5 நாட்களுக்குள் சரிசெய்ய வேண்டும், முசிறி பகுதியில் காவிரியில் தடுப்பணை கட்டி தண்ணீரைச் சேமிக்க வேண்டும் என வலியுறுத்தினாா்.
விவசாயிகள் பேசுகையில், கூட்டுறவுத் துறை மூலம் விவசாயிகளுக்கு எளிதாக கடன் கிடைக்க வழிவகை செய்ய வேண்டும், முசிறி மேட்டு வாய்க்கால், காட்டுவாய்க்கால், கோர வாய்க்கால் மற்றும் பாசன கிளை வாய்க்கால்களுக்கு தண்ணீா் வர வசதியாக திருஈங்கோய்மலை கொண்டமாரி பாசன வாய்க்கால் தலைப்பு முதல் கடைமடை வரை சீரமைத்துத் தர வேண்டும் உள்ளிட்ட கோரிக்கைகளை வலியுறுத்தினா்.