போதைப் பொருள்களை வேரறுக்க மாணவா்கள் துணை நிற்க வேண்டும்: முதல்வா் மு.க.ஸ்டாலின்தமிழகத்தில் போதைப் பொருள்களை வேரறுக்க மாணவா்கள் துணை நிற்க வேண்டும் என முதல்வா் மு.க.ஸ்டாலின் தெரிவித்தாா்.
தமிழகத்தில் போதைப் பொருள்களை வேரறுக்க மாணவா்கள் துணை நிற்க வேண்டும் என முதல்வா் மு.க.ஸ்டாலின் தெரிவித்தாா்.
போதைப் பொருள்கள் இல்லாத தமிழ்நாடு எனும் உறுதி மொழி ஏற்பு நிகழ்ச்சி, சென்னை பல்கலைக்கழகத்தில் திங்கள்கிழமை நடைபெற்றது. இதில் மாணவ, மாணவிளுக்கு முதல்வா் மு.க.ஸ்டாலின் உறுதி மொழி செய்துவைத்தாா்.
உறுதி மொழி விவரம்: போதைப் பழக்கத்தால் ஏற்படும் தீமைகளை முழுமையாக அறிவேன். நான் போதைப் பழக்கத்துக்கு ஆளாக மாட்டேன்.மேலும் எனது குடும்பத்தினரையும், நண்பா்களையும் போதைப் பழக்கத்துக்கு ஆளாகாமல் தடுத்து, அவா்களுக்கு அறிவுரைகளை வழங்குவேன்.
போதைப் பழக்கத்துக்கு உள்ளானவா்களை மீட்டுடெடுத்து, அவா்களை நல் வழிப்படுத்த எனது பங்களிப்பை முழுமையாக வழங்குவேன். போதைப் பொருள்கள் உற்பத்தி, நுகா்வு, பயன்பாடு ஆகியவற்றுக்கு எதிரான தடுப்பு நடவடிக்கைகளின் மூலம் போதைப் பொருள்களை தமிழகத்தில் வேரறுக்க அரசுக்கு துணை நிற்பேன். மாநிலத்தின் வளா்ச்சிக்கும், மக்களின் நல்வாழ்வுக்கும் நான் அா்ப்பணிப்புடன் பங்காற்றுவேன் என உளமாற உறுதி கூறுகிறேன் என முதல்வா் கூற மாணவ, மாணவியா் அதை திரும்பக்கூறி உறுதி ஏற்றனா்.
போலீஸாருக்கு சிறப்பு பதக்கம்: நிகழ்ச்சியில் போதைப் பொருள் ஒழிப்பில் சிறப்பாக பணியாற்றிய தமிழக காவல்துறையின் தேனி மாவட்ட காவல் கண்காணிப்பாளா் ஆா்.சிவபிரசாத், சேலம் மத்திய புலனாய்வு பிரிவு ஆய்வாளா் ஜகன்னாதன், சென்னை மத்திய புலனாய்வுப் பிரிவு உதவி ஆய்வாளா் கே.ராஜ்குமாா், மதுரை மாவட்டம் ஒத்தக்கடை உதவி ஆய்வாளா் ஆா்.அருண், ராமநாதபுரம் மாவட்டம் ஆா்.எஸ்.மங்கலம் காவல் நிலைய முதுநிலை காவலா் ஆா்.துரை ஆகியோருக்கு தமிழக முதல்வா் காவலா் சிறப்பு பதக்கத்தை மு.க.ஸ்டாலின் வழங்கினாா்.
நிகழ்ச்சியில் தமிழக உயா்கல்வித் துறை அமைச்சா் க.பொன்முடி, தலைமைச் செயலா் சிவ்தாஸ் மீனா, உள்துறை கூடுதல் தலைமைச் செயலா் தீரஜ்குமாா், தமிழக காவல்துறை தலைமை இயக்குநா் சங்கா் ஜிவால், சட்டம்-ஒழுங்கு ஏடிஜிபி செள.டேவிட்சன் தேவாசீா்வாதம், சென்னை பெருநகர காவல்துறை ஆணையா் ஏ.அருண், மதுவிலக்கு அமலாக்கப்பிரிவு ஏடிஜிபி அ.அமல்ராஜ் உள்ளிட்ட பலா் பங்கேற்றனா்.