தங்களின் வா்த்தகத் தளம் மூலம் மேற்கொள்ளப்படும் விற்பனைக்காக வா்த்தகா்களிடம் இருந்து வசூலிக்கப்படும் கட்டணத்தை முன்னணி இணையவழி வா்த்தக நிறுவனங்களில் ஒன்றான அமேஸான் குறைத்துள்ளது.
இது குறித்து அந்த நிறுவனத்தின் இந்திய பிரிவு சனிக்கிழமை வெளியிட்டுள்ள அறிக்கையில் தெரிவிக்கப்பட்டுள்ளதாவது:
இந்தியாவில் பண்டிகைக் காலம் தொடங்குவதை முன்னிட்டு அமேஸான் தளம் மூலம் மேற்கொள்ளப்படும் விற்பனைக்கான கட்டணத்தை 12 சதவீதம் வரை குறைக்க முடிவு செய்யப்பட்டுள்ளது.
செப். 9-ஆம் தேதிமுதல் இந்தக் கட்டணக் குறைப்பு அமலுக்கு வருகிறது. இதன்மூலம், விற்பனை செய்யப்படும் பொருள்களின் வகைகளுக்கேற்ப வா்த்தகா்களிடம் இருந்து 3 முதல் 12 சதவீதம் வரை மட்டுமே கட்டணம் பெறப்படும்.
அமேஸான் தளம் மூலம் வா்த்தகா்கள் கூடுதல் பொருள்களை விற்பனை செய்து பண்டிகைக் காலத்தில் தங்களது வா்த்தகத்தைப் பெருக்கிக் கொள்வதற்கு வழிவகை செய்வதற்காக இந்த முடிவு எடுக்கப்பட்டுள்ளது என்று அந்த அறிக்கையில் குறிப்பிடப்பட்டுள்ளது.