தொடர் விடுமுறை: சென்னையிலிருந்து 3,120 பேருந்துகள் இயக்கம் – 1.62 லட்சம் பேர் பயணம்

சென்னை,

வார இறுதி நாட்கள் மற்றும் தொடர் விடுமுறையை முன்னிட்டு நேற்று சென்னையிலிருந்து 3,120 பேருந்துகள் இயக்கப்பட்டதாகவும், அதன்மூலம் 1.62 லட்சம் பேர் பயணம் செய்ததாகவும் போக்குவரத்துத்துறை தெரிவித்துள்ளது. இது தொடர்பாக வெளியிடப்பட்டுள்ள அறிக்கையில் தெரிவிக்கப்பட்டிருப்பதாவது:-

போக்குவரத்துத் துறை அமைச்சர் சிவசங்கரின் அறிவுறுத்தலின்படி, வார இறுதி நாட்கள் மற்றும் தொடர் விடுமுறையை (ஆயுதபூஜை) முன்னிட்டு ஏற்பாடு செய்யப்பட்ட சிறப்பு பேருந்துகளின் இயக்கம் நேற்று (10/10/2024) நள்ளிரவு 12.00 மணி நிலவரப்படி, சென்னையிலிருந்து பல்வேறு ஊர்களுக்கு தினசரி இயக்கக்கூடிய 2,092 பேருந்துகளுடன் கூடுதலாக 1,028 பேருந்துகளும் ஆக நேற்றைய தினம் மொத்தம் 3,120 பேருந்துகள் இயக்கப்பட்டன. இவற்றில் 1,62,240 பயணிகள் பயணித்துள்ளனர். இவ்வாறு அதில் தெரிவிக்கப்பட்டுள்ளது.