புதுடெல்லி,
உலகின் மிகப்பெரிய ஜனநாயக நாடான இந்தியாவில் நடந்து வரும் நாடாளுமன்ற தேர்தல் திருவிழா சர்வதேச அளவில் கவனம் பெற்று இருக்கிறது. 543 தொகுதிகளை கொண்ட இந்திய நாடாளுமன்றத்துக்கு 7 கட்டங்களாக தேர்தல் நடந்து முடிந்துள்ளது. தேர்தலில் பதிவான வாக்குகள் வருகிற 4-ந் தேதி எண்ணப்பட்டு முடிவுகள் அன்றே அறிவிக்கப்படுகின்றன.
இந்தியாவின் ஆட்சிப்பீடத்தை அடுத்த 5 ஆண்டுகளுக்கு அலங்கரிக்கப்போவது யார்? என்ற கேள்விக்கான விடை அன்று பிற்பகலில் கிடைக்கும். ஆளும் பா.ஜனதாவின் ஹாட்ரிக் கனவு நனவாகுமா? அவர்களது நம்பிக்கைக்கு இந்தியா கூட்டணி அதிர்ச்சி அளிக்குமா? என்பதும் 4-ம் தேதி தெரிந்து விடும்.
இந்த நிலையில், பிரதமர் மோடி இன்று ஒரேநாளில் 7 ஆலோசனைக் கூட்டங்களில் பங்கேற்க உள்ளதாக தகவல்கள் வெளியாகியுள்ளன. 'ராமெல்' புயல், வெப்ப அலை, தேர்தலுக்கு பிந்தைய கருத்து கணிப்பு, நாடாளுமன்ற தேர்தலில் பாஜக ஆட்சி அமையும் பட்சத்தில் அடுத்த நூறு நாட்கள் செயல் திட்டம் உள்ளிட்ட 7 முக்கிய விவகாரங்கள் தொடர்பாக பிரதமர் நரேந்திர மோடி தலைமையில் இன்று ஆலோசனைக் கூட்டங்கள் நடைபெற உள்ளன.
மேலும் உலக சுற்றுச்சூழல் தினத்தை பெரிய அளவில் கொண்டாடுவதற்கான ஏற்பாடுகள் குறித்தும் ஆலோசனை செய்ய உள்ளதாக கூறப்படுகிறது.