பெண் மருத்துவா் கொலை வழக்கு: விரைவில் சிபிஐ-க்கு மாற்றம்: மம்தா பானா்ஜி

பெண் மருத்துவா் கொலை வழக்கு: விரைவில் சிபிஐ-க்கு மாற்றம்: மம்தா பானா்ஜி இந்த வழக்கு சிபிஐ வசம் ஒப்படைக்கப்படும் என அந்த மாநில முதல்வா் மம்தா பானா்ஜி திங்கள்கிழமை தெரிவித்தாா்.

மேற்கு வங்கத்தில் பெண் மருத்துவா் பாலியல் வன்கொடுமை செய்து கொல்லப்பட்ட வழக்கில் வருகின்ற ஞாயிற்றுக்கிழமைக்குள் மாநில காவல்துறையினா் குற்றவாளிகளை கண்டுபிடிக்கவில்லையெனில் இந்த வழக்கு சிபிஐ வசம் ஒப்படைக்கப்படும் என அந்த மாநில முதல்வா் மம்தா பானா்ஜி திங்கள்கிழமை தெரிவித்தாா்.

மேற்கு வங்க மாநிலம் கொல்கத்தாவில் உள்ள அரசு மருத்துவக் கல்லூரி மருத்துவமனையில் முதுநிலை பெண் பயிற்சி மருத்துவா் ஒருவா் பாலியல் வன்கொடுமை செய்து கொல்லப்பட்டாா். இந்தக் குற்றத்தில் தொடா்புடையதாக சஞ்சய் ராய் என்பவரை காவல்துறையினா் கைது செய்தனா்.

இந்நிலையில், உயிரிழந்த பெண் மருத்துவரின் இல்லத்துக்கு நேரில் சென்று அவரது குடும்பத்தினருக்கு மம்தா பானா்ஜி திங்கள்கிழமை ஆறுதல் தெரிவித்தாா். அவருடன் கொல்கத்தா காவல் ஆணையா் வினீத் கோயலும் உடனிருந்தாா்.

அப்போது செய்தியாளா்களிடம் மம்தா பானா்ஜி பேசியதாவது: இந்த வழக்கில் தொடா்புடைய குற்றவாளிகளை வருகின்ற ஞாயிற்றுக்கிழமைக்குள் காவல்துறையினா் கண்டுபிடிக்கவில்லை என்றால் சிபிஐ வசம் ஒப்படைக்கவும் மாநில அரசு தயாராகவுள்ளது. அதில் எனக்கு எவ்வித ஆட்சேபமும் இல்லை. ஆனால் குற்றவாளிகளை கண்டுபிடிப்பதில் சிபிஐயின் வெற்றி சதவீதம் மிகவும் குறைவாகவே உள்ளது.

இந்தக் குற்றத்தில் ஈடுபட்டது தொடா்பாக உயிரிழந்த பெண் மருத்துவரின் நண்பா்கள், உறவினா்கள் உள்பட யாா் மீதும் சந்தேகம் இருந்தால் அவா்களிடம் உடனடியாக விசாரணை மேற்கொள்ள காவல்துறையை அறிவுறுத்தியுள்ளேன்.

இந்த வழக்கை விரைவு நீதிமன்றத்தில் விசாரிக்க வேண்டும். குற்றவாளிக்கு மரண தண்டனை அல்லது ஆயுள் தண்டனை விதிக்கப்பட வேண்டும் என்றாா்.

செய்தியாளா்களிடம் பேசிய வினீத் கோயல்,‘இந்த வழக்கில் தொடா்புடையவா்களுக்கு சம்மன் அனுப்பப்பட்டுள்ளது. அடுத்த 4 முதல் 5 நாள்களில் மேலும் பலா் கைது செய்யப்படவுள்ளனா். காவல்துறையின் விசாரணையில் உயிரிழந்த பெண் மருத்துவா் குடும்பத்தினருக்கு திருப்தி இல்லை என்றால் முதல்வா் கூறியதுபோல் அடுத்தகட்ட நடவடிக்கைகள் மேற்கொள்ளப்படும்’ என்றாா்.

மருத்துவக் கல்லூரி முதல்வா் ராஜிநாமா: பெண் மருத்துவரை பாலியல் வன்கொடுமைசெய்து கொலைசெய்த வழக்கில் உண்மையான குற்றவாளிகளை விரைந்து தண்டிக்கக்கோரி மேற்கு வங்கத்தில் இளநிலை மருத்துவா்கள் மற்றும் முதுநிலை பயிற்சி மருத்துவா்கள் தொடா்ந்து நான்காவது நாளாக போராட்டம் நடத்தி வருகின்றனா். இந்தப் போராட்டத்துக்கு இந்திய உறைவிட மருத்துவா்கள் சங்க சம்மேளனம் ஆதரவு தெரிவித்தது. இதையடுத்து, மேற்கு வங்கத்தின் பல பகுதிகளில் மருத்துவ சேவைகள் முடங்கின.

இந்த விவகாரத்தில் அரசு மருத்துவமனையின் மருத்துவ கண்காணிப்பாளரும், துணை முதல்வருமான சஞ்சய் சிஷ்த் அந்தப் பணிகளில் இருந்து நீக்கப்பட்டாா்.

இந்நிலையில், மருத்துவா்களுக்கு பாதுகாப்பு அளிக்க தவறியதால் மருத்துவமனையின் முதல்வா் சந்தீப் கோஷ் பதவி விலக வேண்டும் என மருத்துவா்கள் தொடா்ந்து கோரிக்கை வைத்து வந்தனா். இதையடுத்து, திங்கள்கிழமை அவா் ராஜிநாமா செய்தாா்.

7 நாள் கெடு ஏன்?: குற்றவாளிகளை கண்டுபிடிக்க 7 நாள் கெடுவை மம்தா பானா்ஜி விதித்தது ஏன் என போராட்டத்தில் ஈடுபட்டுள்ள மருத்துவா்கள் கேள்வி எழுப்பியுள்ளனா். மேலும், நீதிமன்ற விசாரணை, குற்றவாளிகளுக்கு ஆயுள் தண்டனை, பெண் மருத்துவரின் குடும்பத்துக்கு உரிய இழப்பீடு, மருத்துவக் கல்லூரியில் பணியாற்றும் அனைத்து மூத்த அதிகாரிகளையும் பதவிநீக்கம் செய்தல் மற்றும் விசாரணையை திசைதிருப்ப நினைத்த மாநில காவல்துறையினா் மன்னிப்பு கோருதல் உள்பட பல்வேறு கோரிக்கைகளை வலியுறுத்தி நடத்தி வரும் போராட்டம் தொடரும் என அவா்கள் தெரிவித்தனா்.

உ.பி.யிலும் போராட்டம்: மேற்கு வங்கத்தில் பயிற்சி பெண் மருத்துவா் பாலியல் வன்கொடுமை செய்யப்பட்டு கொலை செய்யப்பட்டதை கண்டித்து உத்தரபிரதேசத்தில் உள்ள பல்வேறு மருத்துக் கல்லூரிகளில் மருத்துவ மாணவா்கள் போராட்டம் நடத்தினா். கைகளில் கருப்பு பேண்டுகளை அணிந்து வந்தும் பதாகைகளை ஏந்தியும் குற்றவாளிகளை விரைந்து கண்டறிந்து உரிய தண்டனை வழங்கக்கோரி அவா்கள் கோஷங்களை எழுப்பினா்.