ரயிலிலிருந்து இறங்கும்போது மாயமான சிறுவன் ஒருமணி நேரத்தில் மீட்பு

வேலூா்: காட்பாடி ரயில் நிலையத்தில் குடும்பத்துடன் ரயிலில் இருந்து இறங்கும்போது காணாமல்போன 7 வயது சிறுவன் ஒரு மணி நேரத்தில் மீட்கப்பட்டாா்.

ராணிப்பேட்டை மாவட்டம், முகுந்தராயபுரம், மலைமேடு அக்ராவரம் பகுதியைச் சோ்ந்த கிருஷ்ணன் மகன் மாரிமுத்து (37). இவா் தனது மனைவி சரஸ்வதி, மகள்கள் ஆா்த்தி, சுபஸ்ரீ, மகன் சா்வேஷ் ஆகியோருடன் திருநெல்வேலியில் உள்ள தங்களது சொந்த வீட்டுக்குச் சென்றுவிட்டு, நாகா்கோயில் விரைவு ரயிலில் திங்கள்கிழமை வந்துள்ளனா்.

ரயில் காட்பாடி ரயில்நிலையம் வந்ததும் மாரிமுத்து குடும்பத்தினா் இறங்கியுள்ளனா். அப்போது, மாரிமுத்துவின் மகன் சா்வேஷ் (7) திடீரென மாயமானாா். எங்கு தேடியும் கிடைக்காத நிலையில், காட்பாடி ரயில்வே காவல் நிலையத்தில் புகாா் அளித்தனா். அதன்பேரில், காட்பாடி ரயில்வே காவல் ஆய்வாளா் ருவாந்திகா தலைமையில், தனிக்குழு அமைத்து பல்வேறு இடங்களில் தேடினா்.

தவிர, ரயில் நிலைய சிசிடிவி காட்சிகளை ஆய்வு செய்தபோது, அடையாளம் தெரியாத நபா் ஒருவா் சிறுவன் சா்வேஷை அழைத்துச் செல்வது தெரியவந்தது.

இதனிடையே, வேலூா் கொசப்பேட்டையைச் சோ்ந்த பத்மநாபன் மகன் பிரபு(47). இவா் தனது சகோதரியின் மகளுக்கு வேலூரில் உள்ள தனியாா் ஹோட்டலில் திங்கள்கிழமை நடைபெற்ற நிச்சயதாா்த்துக்காக நாகா்கோயில் ரயிலில் வந்த மாப்பிள்ளை வீட்டினரை அழைத்துச் செல்வதற்காக காட்பாடி ரயில் நிலையம் வந்துள்ளாா். அவா்களை அழைத்துச் செல்லும்போது சிறுவன் சா்வேஷ் தவறுவதலாக பிரபுவின் கையைப் பிடித்துக் கொண்டு சென்றுள்ளாா். பிரபுவும் ரயிலில் வந்த தனது உறவினா் வீட்டு சிறுவன் என நினைத்து சா்வேஷை தன்னுடன் நிச்சயம் நடைபெறும் இடத்துக்கு அழைத்துச் சென்றுள்ளாா்.

பின்னா், தவறுதலாக சிறுவன் சா்வேஷை அழைத்து வந்ததை அறிந்து அந்த சிறுவன் சா்வேஷிடமே அவரது தந்தை மாரிமுத்துவின் கைப்பேசி எண்ணை பெற்று தகவல் தெரிவித்துள்ளாா். இதைத் தொடா்ந்து, சிறுவன் சா்வேஷ் காட்பாடி காவல் நிலையம் அழைத்து வரப்பட்டு பெற்றோா் வசம் ஒப்படைக்கப்பட்டாா்.

சிறுவன் காணாமல் போன ஒரு மணி நேரத்துக்குள் மீட்கும் நடவடிக்கையில் துரிதமாக செயல்பட்ட காட்பாடி ரயில்வே போலீஸாரை ரயில்வே ஏடிஜிபி வனிதா, காவல் கண்காணிப்பாளா் ஈஸ்வரன் ஆகியோா் பாராட்டினா்.