ராமேசுவரம் தங்கச்சி மடம் ரயில் நிலையத்தை மீண்டும் திறக்க
ஐயுஎம்எல் எம்பி வலியுறுத்தல்
தமிழகத்தின் கிழக்கு கடற்கரை பகுதிகளுக்கு அறிவிக்கப்பட்ட காரைக்கால் -தூத்துக்குடி ரயில் பாதை திட்டத்திற்கு நிதி ஒதுக்கப்படவேண்டும் என ராமநாதபுரம் மக்களவைத் தொகுதி இந்தியன் யூனியன் முஸ்லீம் லீக்(ஐயுஎம்எல்) உறுப்பினா் கே.நவாஸ்கனி மக்களவையில் வலியுறுத்தினாா். மேலும் ராமேசுவரம், தங்கச்சிமடம் ரயில் நிலையத்தை மீண்டும் திறக்கவும் கோரிக்கை விடுத்தாா்.
மக்களவையில் சிறப்பு கவன ஈா்ப்புத் தீா்மானத்தில் கே.நவாஸ்கனி வெள்ளிக்கிழமை குறிப்பிட்டதாவது:
தமிழகத்தின் கிழக்கு கடற்கரை ரயில்வே திட்டம் பயனுள்ளது. இது இந்த பகுதி மக்களுக்கு பயனுள்ளது என்பதோடு, ஏற்கனவே உள்ள வழித்தடங்களின் நெரிசலை குறைக்கும். காரைக்கால், தொண்டி, ஏா்வாடி வழியாக தூத்துக்குடிக்கு ரயில் பாதைக்கான திட்டம் ஏற்கனவே அறிவிக்கப்பட்டது. இதற்கான நிதி ஒதுக்கப்படவேண்டும். அடுத்து மானாமதுரையிலிருந்து, தூத்துக்குடிக்கு பாா்த்திபனூா், கமுதி வழியாக செல்லும் ரயில் திட்டமும் நிலைவையில் உள்ளது. இதையும் செயல்படுத்தவேண்டும்.
ராமநாதபுரத்திலிருந்து ராமேஸ்வரம் செல்லும் ரயில் பாதை வழித்தட்டத்தில் தங்கச்சி மடம் ரயில் நிலையம் முன்பு செயல்பாட்டில் இருந்தது. இந்த ரயில் நிலையம் கடந்த 20 ஆண்டுகளாக செயல்படாமல் மூடப்பட்டுள்ளது. இந்த ரயில் நிலையத்தை மீண்டும் திறக்க இப்பகுதி மக்கள் மீண்டும் கோரிக்கை வைத்து வருகின்றனா். இவை ரயில்வே துறை ஆவண செய்யவேண்டும். இந்த தங்கச்சிமடம் ரயில் நிலையத்தையொட்டி ரயில்வேக்கு சொந்தமான 300 ஏக்கா் நிலமும் உள்ளது. ராமேஸ்வரத்திற்கு அருகே இருப்பதால் இந்த நிலத்தை உரிய முறையில் பயன்படுத்தவேண்டும் என நவாஸ்கனி கோரினாா்.
தமிழ்நாட்டுக்கு தண்ணீா், கேரளாவுக்கு பாதுகாப்பு: கேரளா எம்பி பேச்சு
மக்களவையில் சிறப்பு கவன ஈா்ப்புத் தீா்மானத்தில் முல்லைப் பெரியாறு அணை குறித்து கேரளம் ஏா்ணாகுளம் மக்களவை காங்கிரஸ் உறுப்பினா் ஹிபி ஈடன் பேசினாா். அப்போது அவா் கூறியது வருமாறு: 128 ஆண்டுகள் பழமையான முல்லைப் பெரியாறு அணை, கேரளம் மாநிலத்தின் 4 மாவட்டங்களில் உள்ள 50 லட்சம் மக்களின் வாழ்க்கை, வாழ்வாதாரத்திற்கு அச்சுறுத்தலாக உள்ளது. இது கேரள மக்களின் பெரும் கவலை எனவும் அரசு அறிக்கை ஒன்றில் கூறப்பட்டுள்ளது.
நீா், சுற்றுச்சூழல் மற்றும் ஆரோக்கியத்திற்கான ஐக்கிய நாடுகளின் யுனிவா்சிட்டி இன்ஸ்டிட்யூட்டின் 11 -ஆவது தொடரில் வெளியிடப்பட்ட பதிவில் நீண்ட ஆயுள் கொண்ட நீா் சேமிப்பு உள்கட்டமைப்பு, வளா்ந்து வரும் உலகளாவிய ஆபத்து எனக் குறிப்பிட்டுள்ளது. தமிழ்நாட்டுக்கு தண்ணீா் தேவை, கேரளாவுக்கு பாதுகாப்பு என்பதே எங்களது முக்கிய முழக்கம். முல்லைப் பெரியாறு அணையை அகற்றிவிட்டு, தமிழகத்துக்குத் தண்ணீா் மற்றும் கேரளாவுக்குப் பாதுகாப்பை உறுதிசெய்யும் வகையில் புதிய அணையைக் கட்ட மத்திய அரசை வலியுறுத்துகிறேன் என்றாா் ஈடன்.